બાળ કાવ્ય સંપદા/પતંગિયાને
Jump to navigation
Jump to search
પતંગિયાને
લેખક : પૂજાલાલ
(1901-1985)
આંગળી અડાડતો ન ભાઈ !
પતંગિયાને આંગળી અડાડતો ન ભાઈ !
નર્યું નાજુક છે એ નાનું,
મીઠડું મીઠડું મજાનું,
એને નાહક સતાવતો ન ભાઈ ! - પતંગિયાને...
ફૂલેથી ફૂલે ફરી ફરીને
છે બેઠું જો ને, જરા એ ઠરીને,
કેવું લાગે છે એ દેવતાઈ ! - પતંગિયાને...
ભલીભોળી છે શી આંખ !
રંગ રંગ રૂપાળી પાંખ !
રૂડા રંગોની છાંટ, શી છવાઈ ! – પતંગિયાને...
એને અંગે રજોટી
છે મખમલ શી ચોટી,
એને લૂછવા જતો ન લલચાઈ ! - પતંગિયાને...
મીટ માંડી એ મેર
રાચ આનંદભેર,
પ્રેમે જોતો રહે તું પુલકાઈ ! - પતંગિયાને...
લાગે છે એ વહાલું
કોડીલું કાલું કાલું
એની સાથે છે સ્નેહની સગાઈ ! - પતંગિયાને...