બાળ કાવ્ય સંપદા/શું શું ગમે ?
Jump to navigation
Jump to search
શું શું ગમે ?
સુશીલા ઝવેરી
(1920-2007)
તારું દીધું કુદરત મને સઘળું ગમે;
તારાં નિત નવાં રૂપ મારા મનમાં રમે
પેલી વરસંતી વાદળીમાં ન્હાવું ગમે;
એની ઝીણી ઝરમરમાં ભીંજાવું ગમે
વળી સૂરજના સોને રસાવું ગમે;
એનાં કોમળ કિરણોમાં ભીંજાવું ગમે
વળી વેલડી ને વૃક્ષોને મળવું ગમે;
થઈ પતંગિયાં ફૂલ ફૂલ ભમવું ગમે
મોટા સાગરે તરંગ થઈ રચવું ગમે;
બની ઊછળતી નાવ મને નાચવું ગમે
ઊંચા ડુંગરની ટોચ મને ચડવું ગમે;
ઘણી અણજાણી કેડીએ રખડવું ગમે
આભે પંખીની જેમ સદા ઊડવું ગમે;
ચાંદ તારલીની જેમ નભે ઘૂમવું ગમે