મંગલમ્/મઝા પડે
મઝા પડે
મઝા પડે, મઝા પડે,
જો રોજ રોજ રમવાની રજા પડે (૨)
ખેતરમાં ખેડુને કહીએ બૂમ પાડી,
ખેડુભાઈ…(૨) રમવા આવોને આગગાડી;
ખેડુ કહે: લોક સહુ ભૂખે મરે
જો રોજ રોજ રમવાની રજા પડે (૨)— મઝા૦
ચાંદા-સૂરજની પાસ જઈ પૂછીએ,
રમવા આવોને વીરા, સંગે મળી કૂદીએ;
બેઉ બોલ્યા: અંધારે જગ સહુ ડરે,
જો રોજ રોજ રમવાની રજા પડે (૨)— મઝા૦
ફૂલને જઈ પૂછીએ ડાળીએ ઝૂલતાં,
અમારી સંગ કેમ રમવાનું ભૂલતાં?
ફૂલ કહે: દેવ શિર કોણ રે ચડે?
જો રોજ રોજ રમવાની રજા પડે (૨)— મઝા૦
— અજ્ઞાત