સિગ્નેચર પોયમ્સ/મીઠા ઉજાગરા – પ્રભુલાલ દ્વિવેદી

મીઠા ઉજાગરા

પ્રભુલાલ દ્વિવેદી

મીઠા લાગ્યા તે મને આજના ઉજાગરા,
⁠જોતી’તી વ્હાલાની વાટ રે...
અલબેલા કાજે ઉજાગરા.

પગલે પગલે એના ભણકારા વાગતા,
⁠અંતરમાં અમથા ઉચાટ રે...
અલબેલા કાજે∘︎

બાંધી મેં હોડ આજ નીંદરડી સાથે ત્યાં,
⁠વેરણ હીંડોળાખાટ રે...
અલબેલા કાજે∘︎

ઘેરાતી આંખડીને દીધા સોગન મેં,
⁠મટકું માર્યું તો તારી વાત રે...
અલબેલા કાજે∘︎

આજના તો જાગરણે આતમા જગાડ્યો.
⁠જાણે ઊભી હું ગંગાને ઘાટ રે...
અલબેલા કાજે∘︎
મીઠા લાગ્યા તે મને આજના ઉજાગરા.