હાલરડાં/નંદકિશોર

નંદકિશોર

નંદકિશોર રે નંદકિશોર,
ઝૂલે પારણિયે નંદકિશોર

સોનાના મોર ઝૂલે નંદકિશોર
પ્યારાને પારણે સોનાના મોર.

કોઈ રે કાનાને નેણે સારો કાજળિયાં,
ફરતી મેલાવો રૂડી કસુંબલ કોર. – પ્યારાને૦

હીરા માણેક તો જડિયાં પારણિયે,
બાજુ શોભે રૂડી મોતીડાંની કોર. – પ્યારાને૦

સોનાનાં સોગઠાં રૂપાનાં રમકડાં,
કાનો કરે છે માંહીં મીઠા કલ્લોલ. – પ્યારાને૦

હેતે કરીને ગોપી હરિને ઝુલાવે,
હાથે શોભે છે રૂડી હીરલાની દોર. – પ્યારાને૦

બ્રહ્માનંદ કહે ખમા રસિયા વાલમને,
અવિચળ રહો રાધાકૃષ્ણની જોડ. – પ્યારાને૦