હેમંત ધોરડાનાં ચૂંટેલાં કાવ્યો/કદી આમ ખળખળો છો કદી તેમ છોળ ભળતા

કદી આમ ખળખળો છો કદી તેમ છોળ ભળતા
અમે કણથી કણ ભટકીએ તમે વાછટે ઊછળતા

અમે જાતના ગરગડી તમે હાથ આજનમ છો
બહુ પાસ પાસ આવી તમે પાછું પાછા વળતા

ન કશે નજરમાં ચડીએ ન ખબરમાં ક્યાંય મળીએ
અમે વાડથી ન વધીએ તમે ઊંચી ડાળ લળતા

વળી ડગડગર અટકવું વળી ભીડમાં ભટકવું
અમે વસમી વાટ વળીએ તમે ફૂલથી નીકળતા

અમે ખાલી હાથ ડાબે અમે ખાલી હાથ જમણે
તમે છેતરો ઉજાસે તમે ચાંદનીમાં છળતા

છંદવિધાન
લલગાલગા લગાગા લલગાલગા લગાગા