ગુજરાતી એકાંકીસંપદા/મોક્ષ: Difference between revisions

પુરુષઃ (મુમુક્ષાને શોધવા હાથપગના ધમપછાડા મારે છે. અકળાઈને) મને સ્વર્ગ પ્રત્યે નફરત થાય છે.

સ્ત્રીઃ (ટિચાયેલા પગ પર ફૂંક મારતાં) મને સ્વર્ગમાં જવાની અભિલાષા થાય છે.

પુરુષઃ (ઉશ્કેરાઈને) એટલી વારમાં બદલાઈ ગઈ?

સ્ત્રીઃ (ગંભીરતાથી) હું બદલાઈ નથી.

પુરુષઃ (ક્રોધાવેશમાં) તું જુઠ્ઠી છે.

સ્ત્રીઃ (ગંભીરતાથી) હું કદી જુઠ્ઠું બોલતી નથી.

પુરુષઃ (આવેશમાં આવીને મોટેથી) તો તું દંભી છે. તરકટી છે. અત્યાર સુધી તું સ્વર્ગને ધિક્કારતી હતી. સ્વર્ગની બહાર જવાની વાત કરતી હતી.

સ્ત્રીઃ (પ્રેમપૂર્વક) મુમુક્ષુ?

પુરુષઃ (ગુસ્સામાં) શું છે?

સ્ત્રીઃ (હળવેથી) યાદ કર.

પુરુષઃ (નરમ પડતાં) શું?

સ્ત્રીઃ (નવાઈપૂર્વક) એટલી વારમાં ભૂલી ગયો?

પુરુષઃ (અકળાઈને) શું?

સ્ત્રીઃ (ગંભીરતાથી) સ્વર્ગ. અત્યાર સુધી તું સ્વર્ગનું રટણ કરતો હતો. (વિરામ) સ્વર્ગ એટલે ઈશ્વરનું ઘર. (વિરામ) સ્વર્ગ એટલે દેવોનું નગર. (વિરામ) સ્વર્ગ એટલે પરીઓનું નીડ. (યાદ કરીને) સ્વર્ગ એટલે પુણ્યાત્માઓનો પ્રદેશ. (વિરામ) સ્વર્ગમાં દુઃખ નથી. (વિરામ) સ્વર્ગમાં તાપ નથી, સંતાપ નથી. (વિરામ) સ્વર્ગમાં પાપ નથી, પ્રાયશ્ચિત્ત નથી. (વિરામ) સ્વર્ગમાં સતત આનંદ છે. સતત વસંત છે. સતત યૌવન છે. (વિરામ) સ્વર્ગમાં જરા નથી. મૃત્યુ નથી. (વિરામ) સ્વર્ગમાં… (અટકી જાય છે.)