શાહજહાં/ચોથો પ્રવેશ: Difference between revisions

સ્થળ : જોધપુરનો કિલ્લો. સમય : પ્રભાત  

મહામાયા : ગાઓ, ચારણીઓ.

[પહેરેગીર પ્રવેશ કરે છે.]

પહેરેગીર : માઉજી —

મહામાયા : શા સમાચાર છે, કિલ્લેદાર?

પહેરેગીર : મહારાજ પધાર્યા છે.

મહામાયા : પધાર્યા? જુદ્ધ જીતીને પધાર્યા?

પહેરેગીર : ના, માઉજી, હારીને પાછા આવ્યા છે.

મહામાયા : હારીને પાછા આવ્યા છે? તું આ શું બોલે છે? કિલ્લેદાર! કોણ હારીને પાછું આવ્યું છે?

પહેરેગીર : મહારાજ.

મહામાયા : શું મહારાજ જશવંતસિંહ હારીને પાછા આવ્યા છે? આ હું શું સાંભળું છું? જોધપુરના મહારાજ — મારા સ્વામીનાથ — જુદ્ધમાં હારીને પાછા આવ્યા છે? ક્ષત્રીવટની શું આટલી હદ સુધી અધોગતિ થઈ ગઈ! બને નહિ. ક્ષત્રીવીર જુદ્ધમાંથી હારીને પાછો આવે જ નહિ. ને જોધાણનાથ જશવંતસિંહ તો ક્ષત્રિયોનો મુગટમણિ. કદાચ જુદ્ધમાં હાર્યાયે હોય. ને એવું બન્યું હોય તો મારા સ્વામીનાથની કાયા પણ ત્યાં જ પડે. મહારાજ જશવંતસિંહ જુદ્ધમાં હારીને કદાપિ પાછા આવે નહિ. ને જે આવ્યા હોય તે મહારાજ જશવંતસિંહ જ નહિ. એ તો કોઈક એનો વેશધારી ધુતારો. એને દાખલ થવા દેશો મા. કિલ્લાનાં કમાડ બંધ કરો. ગાઓ, ચારણી બહેનો, ફરી ગાઓ.

[ચારણીઓ ગાય છે.]