નારીસંપદા : ટૂંકી વાર્તા/ડોગબેલ્ટ: Difference between revisions

દરવાજો ખોલતા જ રિધમ એક ધબકારો ચૂકી ગઈ. પોતે સામે ઊભેલી એ જાજરમાન સ્ત્રીને આવકારે એ પહેલાં જ એક નાનકડું કૂતરું એટલે કે ગોલી રિધમ તરફ રીતસરનું ધસી આવ્યું અને એને વ્હાલ કરવા લાગ્યું. આ બધું જોઈને એ જાજરમાન સ્ત્રી એટલે કે સોનિયાનો ચહેરો ફિક્કો પડી ગયો. એના ચહેરાના હાવભાવ તરત જ ઊકેલીને રિધમ સ્વસ્થ થઈ ગઈ અને સોનિયાને આવકાર આપ્યો. અંદર પ્રવેશતાં જ સોનિયાની નજર ઘરમાં બધે ફરી વળી અને પછી, સોફા પર બેસી ત્યાં સ્થિર થઈ ગોલી પર કે જે પોતાની સામે ખુરશીમાં બેસેલી રિધમને હજુ સુધી વળગેલું હતું. સોનિયાને ખુબ ચીડ ચડી અને ગોલીને "ગોલી...કમ હિયર" કહી આદેશ આપ્યો. ગોલી કંઈક અંશે ગભરાઈને સોનિયાની બાજુમાં નીચે શાંત થઈને બેસી ગયું. રિધમ અંદર જઈને ટ્રેમાં પાણીનો ગ્લાસ લઈને આવી. સોનિયા હજુ સુધી એના ઘરને બારીકાઈથી જોઈ રહેલી, ઘર આમ જુઓ તો બિસ્માર હાલતમાં હતું : દીવાલો પરથી પોપડી ખરેલી હતી - પણ, ઊજાસ સારો હતો. પડદાં જૂના હતાં પણ મેલા જરા પણ નહીં.  એક પાટ પર સાવ ઘસાઈ ગયેલી, પણ ઉજળી ચાદર અને એક ખુરશી જેમાં કદાચ રિધમ વાંચતી હશે કોઈ પુસ્તક ત્યાં પડેલું. સાવ નાનકડા રૂમને રિધમે ખુબ સુંદર રીતે સજાવેલું. નાનકડી બાલ્કનીમાં ઘણાં ફૂલછોડ સાથે એક નાનકડી લાઇબ્રેરી પણ હતી. ઘરની સ્વચ્છતાએ સોનિયાની આંખ આંજી દીધી. જાણે પોતે પહેરેલાં બધાં હીરાના દાગીના અને મોંઘાદાટ વસ્ત્રો રિધમની સાદગી સામે ફિક્કા પડી ગયાં. પોતાની સામે ખુરશીમાં બેસેલી રિધમની હવામાં ફરફરતાં ખુલ્લાં વાળની લટ સોનિયાની આંખમાં આવીને ખૂંચતી હતી. સોનિયાએ પાણી પીને પછી સ્વસ્થ થઈને વાત શરુ કરી...

: અહીં, એકલી જ રહે છે? રિધમે 'હા...’ કહી ખાલી ડોકું ધુણાવ્યું. આગળ કશું બોલે એ પહેલાં જ સોનિયાએ.. ‘હા, સારું જ ને સિંગલ ઈન્ડિપેન્ડન્ટ.. મન ફાવે એમ રહી શકાય. બરાબર ને?’  રિધમે કશી પ્રતિક્રીયા આપી નહીં. આંખો ઢાળીને બેસી રહી. સોનિયાએ વળી ઉમેર્યું...

: ‘તારા પેરેન્ટ્સ સારાં કહેવાય નહીં? - તને આમ એકલી રહેવા અલાઉ કરે છે?

: ‘એકચ્યુલી મારાં પિતા હયાત નથી...’ રિધમ ગંભીર થઇ ગઈ.

: ‘મમ્મી ક્યાં છે અત્યારે? એ તારી સાથે નથી રહેતાં...કે પછી તને નથી ગમતું?’ રિધમે કશો જ જવાબ આપ્યો નહીં. થોડીવાર મૌન છવાયેલું રહ્યું.

સોનિયાએ ટેબલપર પડેલું મેગેઝિન ઉઠાવ્યું, આમ તેમ ફેરવી પાછું ટેબલપર મૂક્યું.

થોડી નર્વસ તો હતી જ અનેક વિચારો ઘેરી વળ્યાં. પોતે ક્યાં જાણતી ના હતી કે સોનિયા અહીં કેમ આવી છે. અંદરથી તો ઘણું તૂટી ફૂટી ગયેલું હતું. વેરવિખેર... પણ... ક્યાં સુધી? નીરવ શાંતિમાં પાણી ભરેલાં પાત્રમાં એક પાણીનું ટીપું મધુર અવાજ સર્જે એવા જ અવાજ સાથે મોબાઈલમાં એક મેસેજ આવીને પડ્યો. મોબાઇલ સ્ક્રીન પર મૂકેલાં એ કવરફોટા સામે જોઈ રહી. પોતાનો મૉસ્ટ ફેવરિટ પીક આદિત્ય સાથેનો. એ જ પીક…કે જેને લઈને આદિત્યએ એની સાથે ઝગડો કરેલો. ફેસબૂક પર અપલોડ કરવા બદલ. એણે કિચનની બાલ્કનીમાં આવેલા ફુદીનાના છોડમાંથી તાજા પાન તોડવા બારી બહાર હાથ લંબાવ્યો.. અને નાનપણમાં પોતાના ઘેર આવતા માળીકાકાની એ કટકટ કરતી કાતર યાદ આવી - જે છોડઝાડની બુઠ્ઠી ડાળીઓ કાપી નાખતી, ને પછી બધું ફરી.. લીલુંછમ. ફુદીનાવાળી ચાની સુગંધ આખા ઘરમાં ફેલાવા લાગી. ચાની સુગંધ એના પર માદક અસર કરતી. ફુદીનાવાળી ચા...આદિત્ય....આદિત્ય....ચા...અને બીજું પણ ઘણું બધું. પણ, ત્યાં જ પેલી કાતર: 'કટકટ. કટકટ...' રિધમ ચાની સુગંધને ખંખેરી ટટ્ટાર થઇ. મોબાઇલમાંથી અને ફેસબુકમાંથી પીક ડીલીટ કર્યું. શ્વાસ ખેંચીને બહાર કાઢ્યો. ખુલ્લાં વાળ પર ક્લિપ ભરાવી પ્રતિબદ્ધ થઈ. હાથમાં ચાની ટ્રે લઈ બહાર આવી.

: ‘લગ્ન વિષે કોઈ વિચાર કર્યો કે નહીં ?’ ચાનો કપ નીચે મૂકી સોનિયાએ ફરી મમરો મૂક્યો.

: ‘મારાં ધ્યાનમાં છે એક ઠેકાણું. હા,બે બાળકો છે. પણ, મોટા સમજુ છે. સુખસગવડ સારી છે. એટલે એટલીસ્ટ તારાં મની પ્રૉબ્લેમ સોલ્વ થઇ જશે.’ સોનિયા આટલું બોલીને રિધમ સામે જોઈ એના જવાબની જાણે રાહ જોતી હોય એમ જોવા લાગી.

રિધમના બેફિકરાઈ ભર્યા જવાબથી સોનિયા ફરી અકળાણી.. ‘ગોલી નાવ ઇટ્સ ઇનફ.’ અને ગોલી પાસેથી બાઉલ લઈને દૂર મૂકી દીધો. ગોલી ચુપચાપ બેસી રહ્યું. ફરી શાંતિ છવાઈ ગઈ.

: ’હું ગોલીને ગુસ્સો કરું એ ના ગમે તો પણ, ડિસિપ્લિન...ઇઝ ડિસિપ્લિન. અને મારાં ઘરમાં એ ફોલો કરવી જ પડે બધાને.’  સોનિયાએ પોતાનો રુવાબ બતાવવાનું શરૂ કર્યું..’  મારાં ઘરમાં કશું જ આમતેમ ના ચાલે. યુ નો. ગોલી - આમ તો અમારી સાથે અમારાં ઘરમાં જ રહે છે. પણ, એને હળવું થવું હોય ત્યારે આઈ મીન છી. પી ઓર એટસેટ્રા... યુ નો..ત્યારે એ ચુપચાપ બહાર સરકી જાય. કામ પતાવીને ફરી પાછું ઘરમાં અને વળી મને આ ખબર હોય છે । સોનિયાએ ધસમસતો પ્રહાર કર્યો અને ઊભી થઈ ગઈ. ગોલીને ફરી છુટ્ટો મૂક્યો. રિધમ પાસે બોલવા લાયક કશું જ હતું નહીં.