બાળ કાવ્ય સંપદા/ઝરણાં
Jump to navigation
Jump to search
ઝરણાં
લેખક : તથાગત પટેલ
(1942)
ટાબરિયાં સમ ન્હાતાં ઝરણાં
કલકલ કરતાં ગાતાં ઝરણાં,
દોડાદોડી – પકડાપકડી,
શોધીને સંતાતાં ઝરણાં,
ઊંચે નીચે કૂદંકૂદા
અથડાતાં પછડાતાં ઝરણાં,
ખીણોમાં ને મેદાનોમાં
ખોવાતાં છલકાતાં ઝરણાં,
ચોમાસામાં મોટાં થાતાં,
ઉનાળે કરમાતાં ઝરણાં,
રમતાં રમતાં આગળ વધતાં
તરસ્યાંને જળ પાતાં ઝરણાં,
પાસે જાતાં સ્વાગત કરતાં
બાળકથી હરખાતાં ઝરણાં.