કાવ્ય-આચમન શ્રેણી – માધવ રામાનુજ/૨૮. એ જ તમે છો

From Ekatra Wiki
Jump to navigation Jump to search
૨૮. એ જ તમે છો

પરોઢિયાના પાલવ ઓથે
રતુંબડું જે સ્મિત,
સ્વપ્નના આંજણવાળી આંખે
જોયું હતું અમે જે —
એ જ તમે છો?

પાંખડીએ ઝાકળમાં જાગી
ઝલમલતું જે ગીત,
હવાનાં હળુહળુ કંપનમાં
ગૂંથ્યું હતું અમે જે —
એ જ તમે છો?

ફૉરી પાંપણથી વરસી જે
પ્રથમ વ્હાલની ફરફર,
ભરતાં પાપા પગલી
થયા હતા તરબોળ અમે જે —
એ જ તમે છો?

ભર્યા મારગે ભેળું થયું’તું
લજ્જાળુ ધરતીનું ભીનું રૂપ,
સૂર્યના કૂણા કૂણા સ્પર્શે
પરખ્યું હતું અમે જે —
એ જ તમે છો?

ઠર્યે દીવડું ઝળાંઝળાં અંધાર,
શ્વાસમાં ભર્યો અમે જે —
એ જ તમે છો?

ધબકારા ઓઢીને
મઘમઘ હૂંફ પામતા રહ્યા અમે જે —
એ જ તમે છો?


૧૯૬૯

(અંતરનું એકાંત, પૃ. ૧૧૩)