બાળ કાવ્ય સંપદા/તારે મેહુલિયા
Jump to navigation
Jump to search
તારે મેહુલિયા
લેખક : અવિનાશ વ્યાસ
(1911-1984)
તારે મેહુલિયા કરવાં તોફાન,
અમારા લોકોના જાય છે જાન !
મંડ્યો તે મંડ્યો, તું મુશળધાર,
કેવી રીતે મારે જાવું નિશાળ ?
ચંપલ મારી છબ છબ થાય,
ધોયેલી લેંઘી મારી બગડી જાય.
અવળા ને સવળા વાયરા વાય,
ઓઢેલી છત્રીનો કાગડો થાય !
કેળાના છોતરે લપસી જવાય,
ત્યારે તો ભાઈ મને ! શું શું થાય !
હુંયે મેહુલિયો, રમવાને જાઉં,
ભૂખ્યો થતો ને ઘેર આવી જાઉં,
ના જાઉં તો બા, બોલાવી જાય,
પકડાઉ ના તો, પૂંઠે ધાય.
તારું મેહુલિયા કયું છે ગામ ?
તારા બાપુજીનું શું છે નામ ?
ઘણા દહાડાથી આવ્યો છે અહીં,
કેમ તારી બા તને લઈ જાય નહિ ?