ભરત વિંઝુડાની ગઝલસંપદા/સહેજે નહીં

૪૬
સહેજે નહીં

જીવું છું એમ સળવળવાનું, ટળવળવાનું સહેજે નહીં,
કવિતાઓ જ લખવાની બીજું કરવાનું સહેજે નહીં!

ભીતરમાં ને ભીતરમાં નાહી ધોઈ સૂઈ જાવાનું,
ઉઘાડી દ્વાર ઘરની બહાર નીકળવાનું સહેજે નહીં!

મહોબતનો કરી સ્વીકાર એવી શર્ત રાખે છે,
નજર સામે જ રહેવાનું અને મળવાનું સહેજે નહીં!

તમે એ બે જણાં વચ્ચેનું સંપર્કસૂત્ર સમજાવો,
કહેવાનું બધું ને સામે સાંભળવાનું સહેજે નહીં!

અગર આંખોમાં આવે આંસુ તો એકાંતમાં જઈને,
વહાવી નાખવાના એને પણ રડવાનું સહેજે નહીં!

બધાં એ રોશનીમાં શોભી ઊઠે એવું કરવાનું,
દીવાએ માત્ર બળવાનું છે, ઝળહળવાનું સહેજે નહીં!

(તમે કવિતા છો)