મંગલમ્/મા-બાપને ભૂલશો નહીં

મા-બાપને ભૂલશો નહીં

ભૂલો ભલે બીજું બધું, મા-બાપને ભૂલશો નહીં,
અગણિત છે ઉપકાર એના, એહ વિસરશો નહીં.

પથ્થર પૂજ્યા પૃથ્વી તણા, ત્યારે દીઠું તમ મુખડું,
એ પુનિત જનનાં કાળજાં, પથ્થર બની છૂંદશો નહીં.

કાઢી મુખેથી કોળિયા, મોંમાં દઈ મોટાં કર્યાં,
અમૃત તણા દેનાર સામે, ઝેર ઊગળશો નહીં,

લાખો લડાવ્યાં લાડ તમને, કોડ સૌ પૂરાં કર્યાં,
એ કોડના પૂરનારના કોડ પૂરવા ભૂલશો નહીં.

લાખો કમાતા હો ભલે, મા-બાપ જેથી ના ઠર્યાં,
એ લાખ નહિ પણ રાખ છે, એ ભાવના ભૂલશો નહીં.

સંતાનથી સેવા ચહો, સંતાન છો સેવા કરો,
જેવું કરો તેવું ભરો, એ ભાવના ભૂલશો નહીં.

ભીને સૂઈ પોતે અને સૂકે સુવાડ્યા આપને,
એ અમીમય આંખને ભૂલીને ભીંજવશો નહીં.

પુષ્પો બિછાવ્યાં પ્રેમથી, જેણે તમારા રાહ ૫૨,
એ રાહબરના રાહ પર, કંટક કદી બનશો નહીં,

ધન ખરચતાં મળશે બધું, માતા-પિતા મળશે નહીં,
પલ પલ પુનિત એ ચરણની ચાહના ભૂલશો નહીં.