શાંત કોલાહલ: Difference between revisions

ક્ષણને આધાર

લયની લલિત ગતિ જેમ કરી ઊર્ધ્વ મહીં આરોહણ

અંતરીક્ષ મહીં સદ્ય પામે તિરોધાન

પર્ણે પર્ણે પદઠેક લઇ

પુષ્પગંધન મહીં કરી નિમજ્જન

પ્રમત્ત સમીર

લથડબથડ જાય વહી નિરંકુશ

(ધીરી અડફેટે અડી લેઈ મુજ અંગ)

(વિચંચલ પાંખ પર રમે ઋજુ ગાન)

સમયનું લઘુ ઘૂંટ મહીં સ્વાદ્ય પાન.

અંજલિનું કીધ આચમન

હૈમવતીને શીતલ સ્પર્શ અનુપમ કોઈ સ્પંદનું સ્ફુરણ.

(શૈલશ્યામ તનુ પર શ્વેત જટાજૂટ)

કેડી એક તુષારઉજ્જવલ

ગતિ કરે છે ચરણ.

જનપદ કુંજ સહુ બને બિંદુલીન

અભ્રપુંજનું યે અવ નિમ્ન આવરણ

ક્યહીં નીલ ઝાંય :

અપ્રતિમ પાર્વતી લાવણ્ય !

હૃદિરમ્ય....